భూ తో మొదలయ్యే పదాలు...

:::::::::

మనబడి రెండు త్రైమాసికాలు పూర్తయ్యాయి. మూడో త్రైమాసికం మొదలయ్యే రోజు గతం లో జరిగిన పాఠ్యాంశాలు పిల్లలు గుర్తు పెట్టుకున్నారో లేదో చూద్దామని ప్రశ్నలు వెయ్యడం మొదలు పెట్టా. అడిగిన వాటిలో చాలా మటుకు ఠకీ ఠకీ మని చెప్పేశారు. ఇక చివరగా కొన్ని అక్షరాలు చెబుతూ ఆ అక్షరాలతో మొదలయ్యే పదాలు చెప్పమన్నాను. ఒక్కో దానికి తమకు గుర్తున్న వన్నీ చెప్పేశారు. ఇన్ని అడిగాం కదాం నా పేరు గుర్తు పెట్టుకున్నారో లేదోనని ఓ అక్షరం చెప్పా.

"భూ తో మొదలయ్యే పదాలు చెప్పండి"

మొదటగా చెయ్యెత్తింది మా బుడ్డోడు. ఇక వెంటనే ఇంకో అయిదు చేతులు పైకి లేచాయి " నేను చెబుతా..నేను చెబుతా.." అని.మా బుడ్డోడు ఏమి చెబుతాడో నాకు తెలుసు. అనుమానం లేదు ఖచ్చితంగా వాడు నా పేరే (భూపతి విహారి) చెబుతాడు అనే నమ్మకంతో వాడి నడక్కుండా మిగతా అందర్ని అడిగా.

ఒక్కొకళ్ళు భూమి, భూదేవి, బూంది (శబ్దం అదేగా)..... అని చెప్పేశారు. చివరగా మా బుడ్డోడి నడిగా.

"భూమిక.." ఎగిరి గంతేసి చెప్పాడు.

చుక్కలు నా కళ్ళ ముందు ఎగురుకుంటూ కనిపించాయి. క్లాసయిన తరువాత వళ్ళో కూచోబెట్టుకుని
"చిట్టి కన్నలూ!!! నువ్వు నా పేరెందుకు చెప్పలేదురా?"
"కావాలనే చెప్పలేదు"
"నీ కావలనే దొంగ లెత్తుకెళ్ళా. నీకు భూమిక ఎలా తెలుసురా దొంగ భధవా (భడవ+వెధవ)? ఆవిడ నెక్కడ చూశావ్"
"టి.వి. లో వచ్చిన మిస్సమ్మ సినిమా లో చూశా"
"!!!"

మా టీవికీ జై

:::::::::